ديسكيسيون في الإنبوكس

السّلام عليكم
بونسوار( بعدّ الّي السّلام عليكم ترمز لرّجعيّة)

درا منين نعرفك : أكيد تعرفني أنا ...بلوغور

تشرّفنا

و انت وجهك موش غريب عليّا موش عندك بروفيل أكا الّي مسمّي روحك ابن المسيح ؟

أي أنا ..إنسان بسيط ساعات ندخل للفايسبوك نشوف الدّنيا اش صاير فيها و نكتب شويّة

ايه يا حسرة وقت الّي حتّى حد ما يعرف لا بلوغ و لا فايسبوك أحنا كنّا فيه نكتبو ههه

ممكن
:)

موش ممكن ...آه كانت جات الدّنيا دنيا (يضحك و يقلقل في راسو)النّضال فمّا عباد ما عرفت,و كان توّا

صحيح فمّا عباد ركبت على الثّورة ايه لكن كيفاش ناضلت انت

أنا؟ كي تسأل السّؤال هذا معناها ما تعرفش علم تونس

سامحني ما فهمتكش

أنا من عام 2008 عندي مدونة

ايه و بعّد ؟

يا ولدي قتلك من 2008 و أنا عندي مدونة و انت افهم وحدك

ايه ما فهمتكش كان زيد توضّحلي أكثر خاطر في غوغل فمّا مليون مدونة .

انت قريتها مدوّنتي باش تحكم عليها ؟

ياخويا ما حكمتش ...أنا نسأل فيك اش كنت تكتب فيها و كيفاش ناضلت

كنت نكتب فيها على التحضّر و الدّيمقراطيّة و التّعدّدية و أشيائ ترفيهية و اجتماعيّة و ثقافيّة ..بارشا تعد تُغلط
ايه و بخلاف ال"ئيّة" كتبتشي حاجة

أي عييت و أنا نكتب كتبت على الحرّية مثلا

كيفاش يعني ؟ طالبت بإطلاق سراح المساجين ولاّ ضدّ استغلال الطّبقة العمّالية في المصانع و إلاّ ضدّ القضاء الفاسد حدّد بالضّبط ؟

اش باش نقلّك برشا حوايج عملتها مثلا دافعت بكلّ شراسة على حرّية فتح المواقع الإباحيّة بدون رقابة ..أحنا في عصر الإنفتاح يزّينا من الصّنصرةعيب ما يليقش بالمجتمعات المتحضرة

على فكرة فمّا مواقع دينية مصنصرة زادة

شبيك مهبول انت تحب تحلّها ؟ تحب تونس تولّي قندهار ؟ شبيك داخل في حيط
ايه موش قتلي حرّية الإنترنت
ايه يا صاحبي شنوّا حرّية معناها سيّب الماء على البطّيخ ؟

انت قلت يا خويا لا لصنصرة موش أنا

تي افهمني عاد يهديك خلّيك متفتّح

ايه ممكن عندك حقّ... أنا غالط

باهي تنجّمشي تزيد تحكيلي على تاريخك النّضالي جداااا ع ع ع

أنا ناضلت و لا زلت أناضل من أجل فصل الدّين عن الدّولة لا نريد "ديكتاتورية دينيّة " نريدها جمهورية لائكية حداثيّة ...آن الأوان لنلحق برك الدّول المتقدّمة كفرنسا ...اي نعم أنا الأوان فالحداثة و العلمانيّة شيئان مقدّسان لا تنازل عنهما

أي شبيه وجهة نظر نحترمها برشا أما حبّيت نسألك في إطار الدّفاع عن الحرّيات و حقوق الإنسان كتبتشي مدونات على احترام هويّة البلاد و ضرورة احترام ديانة الشّعب
شوف خويا كما قتلك عندنا مكاسب حضارية في تونس يلزمنا نحافظو عليها كما مجلّة الأحوال الشّخصية هاكي لا للمساس بهااااااااا لأنّها من مكتسبات تونس
و بالنّسبة للقرآن و السنّة أوّل حاجة القرآن نأولوه فهو نص غير جامد( نأولوه يعني نأولوه حسب ما نحبّو نأولوه) و السنّة فيها خلاف ...أما حرّية
التّعبير مقدسة

ايه يا خويا لكن فمّا اعتداءات على المقدّسات تصير في حقّ شعب مسلم و رموزو

تي ايه موش مشكلة تو نبرمج نهار نعمل دُوَيْوِنَة نكتبها في هذا الإطار

ممممم

شنيّة اممم موش عاجبتك مدوناتي

لا ما قلت شي

غريبة فيك تو جاي تشكّك في التّارييخ النّضالي متاعي ...البلاد كان ما جاوش فيها مدونين راهو لا صارت لا ثورة لا شي

ممكن مدوناتك عملت تأثير على الرّاي العام ...أما سامحني في النهار قدّاش يدخلها من واحد

يوصلو حتّى 10 من النّاس في نهار واحد

في قلبي (موش بعيد على باجي الّي فيها 100 ألف)

لولا التّدوين يا ابن المسيح راهو مئات مازالو في السّجون و انت تعرف كيفاش ساهمنا في اطلاق فاطمة الرياحي و سليم عمامو و غيرهم برشا ...

فرايمون شابّو ! هايل هالتّدوين

بالله و هاكا الطفل المسكين أمان الله متاع الحقائق الخفيّة الّي تشدّ و دقدقوه (نقطة فوق الق) اش عملتو معاه ساهمتو في اطلاق سراحو ؟

يا ولدي هاكا موش مدوّن ...باش تفهم

تي ايه موش مشكلة المهمّ كان يُنشط و عندو مسار ثوري

يا ولدي بخلاف أقرب نقلّك في وذنك (قربت) : هاكا نهضة ؟

شنوّا ؟

نهضة

ما فهمتكش ؟

ما تعرفش نهضة ؟*****

لا نعرف أما اشمدخّل النّهضة في الدّفاع عليه !

يا ولدي قتلك نهضة تي شبيه مخّك مسكّر ؟؟!!


ايه ما فهمتش ياخي الّي ادّافعو عليهم تعملولهم تحليل دمّ؟ واحد يتعدّى تدافعو عليه و لاخر عندو أمراض ما ينفعش ؟ و لا تعدّيولهم في الباك واحد روفيزاي و لاخر أدمي ؟ راهو انت كيف تشدّيت أنا منعرفكش و دافعت عليك ...

Bien dit هيّا تعرفشي كيفاه انت خ**ت فيه لا تحطّ لا جام و لا تقول

وطول النهار و انت تنبّر هاو باش نعملّك سيبريماي و بلوك .....قدّاكش رجعي